Mælingar á blóði í saur : samanburður á dífenýlamínprófi, Hemo-Fec, Hemoccult SENSA og Hemosure

Abstract

Inngangur: Tvenns konar aðferðir hafa aðallega verið notaðar til þess að mæla blóð í saur, peroxíðasapróf og mótefnapróf. Peroxíðasapróf byggjast á því að blóðrauði virkar sem peroxíðasi en hafa ber í huga að peroxíðasi í matvælum getur orsakað ranglega jákvæða svörun. Mótefnapróf (immunochemical tests) fyrir blóði í saur eru flest sértæk fyrir blóðrauða manna. Tilgangur: Finna próf til mælingar á blóði í saur sem kæmi í stað dífenýlamínprófsins sem hefur verið notað á Blóðmeinafræðideild Landspítala háskólasjúkrahúss (LSH) við Hringbraut. Ákveðið var að hætta að nota þetta próf vegna þess að dífenýlamín er eitrað efni. Efniviður og aðferðir: Saursýnum sem höfðu verið send frá sjúklingum á LSH við Hringbraut á blóðmeinafræðideildina til rannsóknar á blóði í saur var safnað, 81 sýni, og voru flest jákvæð fyrir blóði. Auk þess voru 20 saursýni úr voltarenlyfjakönnun og 19 saursýni úr calprótektínkönnun á sjúklingum með sáraristilbólgur og aðstandendum hryggiktarsjúklinga, 16 saursýni voru frá sjúklingum með Crohn´s sjúkdóm. Saursýnin voru prófuð með peroxíðasaprófunum: Dífenýlamínprófi (DFA), Hemo- Fec (HFec) og Hemoccult SENSA (HSensa) og mótefnaprófinu Hemosure (Hsure). Niðurstöður: Alls voru rannsökuð 136 saursýni. Þar af voru 65 jákvæð með HFec, 59 með DFA, 56 með HSensa og 53 sýni með Hsure. Samræmisstuðull á milli DFA og HFec var � = 0,911, milli DFA og HSensa � = 0,895, milli HFec og HSensa � = 0,837, milli HFec og Hsure � = 0,703, milli DFA og Hsure � = 0,697, og milli HSensa og Hsure � = 0,679. P-gildi var < 0,001 fyrir öllum kappagildum hér að ofan. Ályktun: Besta samræmið var milli DFA og HFec. HFec verður því að teljast ákjósanlegasta prófið til mælingar á blóði í saur á Blóðmeinafræðideild LSH.