Tóbaksvandi geðsjúkra og viðbrögð við honum : Reykleysismiðstöðin á Kleppi

Abstract

Það er alkunna að tóbaksreykingar eru mjög algengar meðal þeirra sem takast á við geðræn veikindi. Þó hefur lítið verið fjallað um tóbaksvanda geðsjúkra á Íslandi. Þessari grein er ætlað að bæta að einhverju leyti úr því og vekja upp umræðu um tóbaksvanda geðsjúkra og viðbrögð við honum. Í greininni er fjallað um áhrif tóbaksreykinga á líkamlegt heilsufar og því lýst hvernig reykingafaraldurinn hefur borist um samfélagið líkt og félagslegt smit. Þær forvarnir sem hafa dregið úr reykingum almennt í samfélaginu virðast ekki hafa náð til geðsjúkra reykingamanna. Nikótín er mjög ávanabindandi. Heilbrigðisstarfsmenn hafa sérstöku hlutverki að gegna við að aðstoða tóbaksfíkla til reykbindindis. Geðsjúkir reykingamenn þurfa sérstaklega á aðstoð að halda vegna þess hve reykingar eru almennar meðal þeirra. Einnig virðist þörf á róttækri breytingu á viðhorfum gagnvart tóbaksreykingum geðsjúkra. Það eru sjálfsögð mannréttindi þeirra að njóta reykleysismeðferðar og hvatningar til reykleysis sem sniðin er að þörfum þeirra. Reykleysismiðstöðinni á Kleppi er ætlað að mæta þessum þörfum geðsjúkra að einhverju marki. Í lok greinarinnar er greint frá starfsemi miðstöðvarinnar.