Hvað er magnetviðurkenningin?

Abstract

Undanfarin ár hafa birst greinar í hjúkrunartímaritum í auknum mæli þar sem vitnað er í svokallað magnetsjúkrahús. Mörg ráðstefnuerindi hafa líka verið haldin um þetta efni þar sem rannsóknaniðurstöður eru kynntar og allar eru þær forvitnilegar. Í ljós kemur að það eru náin tengsl milli starfsumhverfis hjúkrunarfræðinga og þess árangurs sem næst í umönnun og meðferð sjúklinganna. Hvað er magnetfyrirbærið? Hugtakið magnetsjúkrahús, eða eðalsjúkrahús, varð til á níunda áratug 20. aldar í Bandaríkjunum þegar American Academy of Nursing, samtök sem veita hjúkrunarfræðingum viðurkenningu fyrir afburðaframlag til hjúkrunar, gekkst fyrir rannsókn meðal 165 sjúkrahúsa sem tilnefnd voru vegna góðs orðspors. Rannsóknin leiddi í ljós að 41 þeirra skar sig úr með góðum árangri í mönnun hjúkrunarfræðinga þrátt fyrir að önnur sjúkrahús á sama landssvæði væru undirmönnuð (McClure, Poulin, Sovie og Wandelt, 2002).