Offitumeðferð á Reykjalundi

Abstract

Á Íslandi líkt og á flestum vesturlöndum er offita hratt vaxandi heilbrigðisvandamál. Fari sem horfir verður offita stærsta heilbrigðisvandamál þessara landa á fyrri hluta 21. aldar. Hér á landi má ætla að offita (líkamsþyngdarstuðull, LÞS>30) meðal fullorðinna hafi tvöfaldast á síðustu 20–25 árum og sé nú orðin nálægt 20%. Virðist sem ekki sé lát á þeirri aukningu. Þessu til viðbótar má ætla að önnur 35% séu yfir æskilegri þyngd (LÞS 25–30). Þróunin meðal barna og unglinga er enn alvarlegri. Rannsóknir á 9 ára börnum sýna að á 50 árum hefur ofþyngd meðal stúlkna þrefaldast og meðal drengja nær tífaldast. Offita hefur á 25 árum fimmfaldast hjá stúlkum og þrefaldast hjá drengjum. Þannig voru 5,5% 9 ára barna í Reykjavík haustið 2002 með offitu.