Umskipti við flutning á hjúkrunarheimili

Abstract

Heilsufar þeirra einstaklinga sem flytjast á hjúkrunarheimili er almennt mjög bágborið. Samkvæmt RAI-mati hefur meirihluti íbúa á hjúkrunar- og dvalarheimilum, eða 74%, einkenni vitrænnar skerðingar. Stór hluti íbúanna (80%) glímir auk þess við einhverja líkamlega fötlun/ sjúkdóma. Mikill meirihluti þeirra þarfnast þar af leiðandi mikillar aðstoðar við athafnir daglegs lífs og má geta þess að yfir 60% íbúanna notar níu eða fleiri lyf að staðaldri. Á Íslandi búa u.þ.b. 3500 aldraðir einstaklingar á hjúkrunarog vistheimilum. Meðalaldur þeirra er 85 ár og meðaldvalartími er um fjögur ár (Heilbrigðisráðuneytið, 2006). Fyrir þann sem flyst frá heimili sínu á hjúkrunarheimili eru umskiptin mikil og hafa rannsóknir sýnt að það getur tekið þrjá til sex mánuði að jafna sig eftir slíkan flutning (Brooke, 1989). Rannsóknir sýna jafnframt að álag á aðstandendur er mikið. Í sumum tilfellum er stofnanavistun jafnvel erfiðari fyrir þá en einstaklinginn sem flytur á stofnunina (Júlíana Sigurveig Guðjónsdóttir, 2005).