Áhættuþættir meiðsla í knattspyrnu í tveimur efstu deildum karla á Íslandi

Abstract

Margar rannsóknir hafa verið framkvæmdar til að kanna tegund, staðsetningu og alvarleika meiðsla í knattspyrnu.1,3-5,7,8,10-12,16,18-20,25,27,30 Í mörgum rannsóknum hafa mögulegir innri og ytri áhættuþættir verið skoðaðir.1,3,4,9-14,16,18-20,27,30-32 Rannsóknir gefa til kynna að innri áhættuþættir svo sem hækkaður aldur30 og fyrri meiðsli11,12 virðast auka hættu á meiðslum. Sumar rannsóknir benda til að mekanískur óstöðugleiki í ökklum og hnjám, almennur slaki í liðböndum og starfrænn óstöðugleiki geti einnig leitt til meiðsla.1,30,32 Ytri áhættuþættir svo sem lítil þjálfun,9 lágt hlutfall milli æfinga og keppni,14 svo og hart og stamt undirlag1,29 virðast einnig geta aukið hættu á meiðslum. Skilningur á einstaklingsbundnum áhættuþáttum meiðsla er mikilvægur grunnur undir forvarnir. Í slíkum rannsóknum er mikilvægt að nota fjölþátta líkan til að skoða möguleg innbyrðis tengsl áhættuþátta. Markmið þessarar rannsóknar var að skoða tíðni, tegund, staðsetningu og alvarleika meiðsla í tveimur efstu deildum karla í knattspyrnu á Íslandi. Einnig að skoða hvort ákveðnir þættir (aldur, hæð, líkamssamsetning, liðleiki, sprengikraftur, stökkkraftur, hámarks súrefnisupptaka, óstöðugleiki í ökklum og hnjám, fyrri meiðsli og magn æfinga og leikja) gætu flokkast undir áhættuþætti meiðsla.