Klíniskt mat á tannlituðum jaxlafyllingarefnum eftir tvö ár

Abstract

Framleiðendur hafa leitast við að minnka hvörfunarsamdrátt í plastblendi sem er þekkt vandamál. Tilgangur rannsóknarinnar var að bera saman gæði og endingu Hermes Posterior Restorative (3M ESPE) plastblendi ásamt Hermes bindiefni við Tetric Ceram plastblendi og AdheSE bindiefni (Vivadent). Bæði bindiefnin eru sjálfætandi. Efnin voru sett í tennur fullorðinna einstaklinga sem þurftu a.m.k. tvær boxlaga II. klassa fyllingar af svipaðri stærð. Öll efni voru meðhöndluð samkvæmt fyrirmælum framleiðenda. Samtals voru sett 53 fyllingapör sem voru metnar af tveimur sérþjálfuðum skoðunarmönnum eftir einfölduðu USPHS skráningakerfi. Eftir eitt ár voru öll 53 fyllingarpörin skoðuð og 52 pör í 30 einstaklingum eftir tvö ár. Ein Tetric fylling hafði verið fjarlægð vegna viðkvæmni eftir eitt ár, sem útilokaði viðkomandi frá rannsókninni. Við tveggja ára skoðun voru allir snertipunktar innan eðlilegra marka, litur fyllinga og tannholdsástand óbreytt og engin tannáta fannst meðfram brúnum fyllinga. Einungis voru skráð eymsli eða viðkvæmni í einni tönn. Kvarnast hafði úr þremur Tetric fyllingum (Beta) en allar Hermes fyllingar fengu Alfa. Þrjár fyllingar af hvorri tegund höfðu slitnað og fengu Beta. Þegar niðurbrot brúna fyllinga var metið, fengu 43 fyllingar af hvorri tegund Alfa. 40 Tetric (77%) og 34 Hermes (65%) fyllingar voru metnar Alfa þegar mislitun í samskeytum fyllingar/tannar var skoðuð. Ekki var tölfræðilegur munur milli efnanna fyrir neitt atriðið sem metin voru (p<0.05). Við tveggja ára skoðun virðast bæði efnin hæf til að nota í jaxlafyllingar. Há tíðni mislitana á brúnum fyllinga bendir til að bæta þurfi eða breyta um bindiefni.