Þrí- og fjórburafæðingar á Íslandi 1982-1998

Abstract

Tilgangur: Athuga tíðni þrí- og fjórburafæðinga á Íslandi á síðustu 17 árum. Inngangur: Fleirburafæðingum hefur verið að fjölga víðs vegar í heiminum, aðallega vegna árangursríkari meðferða við ófrjósemi. Fleirburafæðingum hafði farið fækkandi hér á ári, en margt bendir til að þeim sé að fjölga aftur. Efniviður og aðferðir: Upplýsingar voru fengnar úr fæðingartilkynningum hjá fæðingarskráningunni um fleirburameðgöngur fyrir árin 1982-1998. Reiknaðar voru tíðnitölur sem hlutfall af öllum fæðingum og borið saman við tölur fyrir tvíburafæðingar. Tímabilinu var skipt upp í tíma fyrir og eftir glasafrjóvgun (in vitro fertilisation, IVF) og seinna tímabilinu skipt í tvö fimm og hálfs árs tímabil til að fá þá þrjá nokkuð jafnstóra hópa hvað varðar heildarfjölda fæðinga. Niðurstöður: Alls voru 73.164 fæðingar á tímabilinu, þar af 960 tvíburar og 34 þrí- og fjórburar (þar af 33 þríburar og einir fjórburar). Fjöldi tvíbura var 239, 298 og 423 í hverjum hópi og tíðni tvíbura því 1:103, 1:85 og 1:55, þegar borið var saman við heildarfjölda fæðinga. Þrí- og fjórburafæðingar voru fjórar, níu og 21 og sambærileg tíðni þeirra því 1:6127, 1:2803 og 1:1116. Aukning á tíðni þrí- og fjórburafæðinga var meiri en á tvíburafæðingum. Af 103 börnum sem voru í þrí- og fjórburahópnum dóu fjögur á burðarmálstíma og því var burðarmálsdauði 38,8%o meðal þeirra. Meðgöngulengd var frá 27-37 vikur og að meðaltali 33,3 vikur. Öll börnin voru tekin með keisaraskurði. Fyrst fæddur þríburi var að meðaltali þyngstur og síðast fæddur léttastur. Meðalþyngd hins síðast fædda var nálægt tveimur staðalfrávikum undir meðallagi einbura miðað við sömu meðgöngulengd. Ályktanir: Tíðni fleirburafæðinga hefur aukist á íslandi á þessu tímabili og sérstaklega á síðasta þriðjungi þess. Þessi aukning virðist falla saman við tímabilið þegar glasafrjóvgunarmeðferðir urðu árangursríkari.