Árangur áfengismeðferðar á Íslandi 28 mánuðum eftir innlögn

Abstract

Inngangur: Áfengissýki og aðrir vímuefnasjúkdómar eru langvinnir sjúkdómar sem herja á marga. Mikilvægt er að vita hver er árangur sjúklinga hérlendis er leita sér meðferðar til þess að meta hvort nóg er að gert og einnig sem viðmið fyrir framtíðina til að sjá hvort árangur meðferðar batni. Efnivíður og aðferðir: Frá desember 1991 til september 1992 var skoðaður 351 sjúklingur, en sjúklingar þessir höfðu lagst inn á meðferðardeildir Landspítalans, deild 16 og 33A, og sjúkrahús SÁÁ að Vogi. Sjúklingarnir voru skoðaðir með ítarlegu geðgreiningarviðtali auk spurninga um drykkju- og félagssögu. Um 16 og 28 mánuðum eftir komu svöruðu sjúklingarnir spurningum er lutu að bindindi og öðrum árangri eftir meðferð. Niðurstöður: Um 16% sjúklinga héldu bindindi í 28 mánuði. Þetta var breytilegt milli stofnana sem skýrist að mestu af því að einstaklingar með mismunandi drykkju- og félagssögu koma á þær. Bestum árangri náðu ungir, giftir, fullvinnandi einstaklingar sem ekki höfðu aðrar geðgreiningar, 23-28% þeirra héldu 28 mánaða bindindi. Verstur árangur var meðal fráskilinna og síkomusjúklinga, en innan við 10% þeirra héldu 28 mánaða bindindi.Svipað hlutfall sjúklinga frá öllum stöðunum lagðist inn aftur, 42-54%, heldur fleiri konur en karlar. Ályktanir: Árangur sjúklinganna eftir áfengismeðferð er mjög breytilegur eftir sögu hvers sjúklings. Jafnvel meðal þeirra sem hafa bestar horfur er núverandi árangur ekki nægjanlega góður. Því er nauðsynlegt að þróa og reyna nýja meðferð vímusjúkra, jafnframt því sem unnið er að auknum forvörnum.