Kviðarklofi á Íslandi 1970-1994

Abstract

Inngangur: Kviðarklofi er sjaldgæfur, meðfæddur galli á kviðvegg. Tíðni hans á Íslandi er ekki þekkt né árangur meðferðar. Markmið: Að ákvarða tíðni kviðarklofa á Íslandi, meðgöngusögu (meðgöngulengd, aldur mæðra, fjölda fyrri meðgangna), árangur meðferðar og lifun. Efniviður og aðferðir: Afturskyggn rannsókn var gerð. Farið var yfir sjúkraskrár, fæðingarskrár og krufningarskýrslur. Tímabilinu var skipt í tvennt, 1970-1982 og 1983-1994. Niðurstöður: Tuttugu og átta börn með kviðarklofa fæddust á íslandi 1970-1994 . Tíu börn fæddust með kviðarklofa á fyrra tímabilinu og 18 börn á síðara tímabilinu. Útreiknuð tíðni var 1,78/10.000 fæðingar á fyrra tímabilinu en 3,45/10.000 fæðingar á því síðara (p=0,09). Engin fóstureyðing var framkvæmd vegna kviðarklofa og ekkert barn fæddist andvana. Aðrir fæðingargallar fundust hjá 13 börnum, þar af garnalokun eða -þrengsli hjá átta. Sjö börn höfðu fæðingargalla utan meltingarvegar (21,4%). Af mæðrum voru 82% (23/28) frumbyrjur, meðalaldur var 21,5 ár. Meðgöngulengd var 30-40 vikur. Sextán börn fæddust með eðlilegum hætti en 12 með keisaraskurði, þar af sex með bráðakeisara. Átján börn greindust við fæðingu en 10 með ómun á 19. viku meðgöngu. Fæðingarþyngd var 2650 g (bil 1500¬3720 g). Kviði var lokað í einni aðgerð hjá 15 börnum, en í tveimur aðgerðum hjá 13 börnum. Legutími var 55 dagar (miðtala 26 dagar; bil 14-351 dagur). Dánatíðni var 10,7% (3/28). Langtímafylgikvillar voru fáir 5/28, aðallega endurtekin kviðverkjaköst og hægðatregða. Ályktanir: Rannsókn þessi gefur til kynna að tíðni kviðarklofa geti verið að aukast á Íslandi en rannsóknin er of lítil til að sú aukning geti orðið marktæk. Ungur aldur mæðra og það að börnin eru yfirleitt frumburðir er í samræmi við niðurstöður annarra rannsókna. Arangur meðferðar vegna kviðarklofa hér á landi er eins og best verður og dánartíðni er lág.