Vélindabólga af völdum herpes simplex veiru í annars heilbrigðum einstaklingum

Abstract

Inngangur: Sýkingar af völdum herpes simplex veiru eru algengar en herpes simplex vélindabólga er hins vegar tiltölulega sjaldgæf. Langoftast er hún greind hjá ónæmisbældum sjúklingum. Við lýsum fjórurn ungum, annars heilbrigðum karlmönnum sem greindir voru með herpes simplex vélindabólgu og gerum grein fyrir rituðu máli um þennan sjúkdóm. Efniviður og aðferðir: Herpes simplex vélindabólga var talin líkleg ef þremur af fjórum skilmerkjum okkar var fullnægt en ákveðin/örugg ef öllum fjórum var fullnægt. Mótefni, IgM og IgG, gegn herpes simplex veiru voru mæld með tveimur mismunandi ELISA aðferðum. Veiruræktun var gerð í Vero og A-549 frumum. Herpes simplex tegund var greind með ELISA aðferð. Sýni tekin frá vélinda voru skoðuð af meinafræðingi. Leit var gerð á MEDLINE að tilfellum herpes simplex vélindabólgu sem lýst var í annars heilbrigðum einstaklingum. Niðurstöður: Fjórir ungir karlmenn greindust með herpes simplex vélindabólgu árið 1997 á Landspítalanum. Greining var líkleg hjá tveimur og ákveðin hjá tveimur. Einn þeirra var upphaflega grunaður um að hafa hjartasjúkdóm og annar að hafa gallblöðrubólgu. Allir reyndust hafa herpes simplex veiru frumsýkingu, voru lagðir inn á sjúkradeild og meðhöndlaðir með vökva í æð og acíklóvír. Við leit í MED¬LINE fundust 12 tilfelli herpes simplex vél-indabólgu í einstaklingum sem ekki voru ónæm-isbældir og fullnægðu skilmerkjum. Að okkar sjúklingum meðtöldum var aldursbil hópsins 18 til 50 ár (meðalaldur 26 ár). Konur voru tvær en karlar 14. Algengasta einkenni var verkur við kyngingu (69%). Hjá átta sjúklingum (50%) var lýst hita en aðeins sex (37,5%) sjúklingar höfðu greinanleg sár í húð og/eða slímhúð við skoðun. Algengast var að greina sár við speglun, venjulega í neðsta hluta vélinda (13/16), en tveir höfðu sár í miðhluta (2/16) og einn eftir endilöngu líffærinu (1/16). Herpes simplex veira-1 ræktaðist frá 10 sjúklingum. Hjá átta sjúkling-um greindust innlyksur í þekjufrumum í vélindasýnum. Mótefnamælingar voru gerðar hjá 10 sjúklingum og samræmdust þær frumsýkingu hjá sex þeirra. Ályktanir: Herpes simplex vélindabólga virðist sjaldgæf í annars heilbrigðum einstaklingum en sjúkdómurinn er sennilega vangreindur. Flestir sem hafa greinst eru ungir karlmenn. Vísbendingar eins og sýnileg mein í húð og/ eða slímhúð eru oft ekki til staðar. Þörf er árvekni og speglunar með sýnatöku til greiningar.