Kawasaki sjúkdómur á Íslandi 1979-1997

Abstract

Kawasaki sjúkdómur er bólgusjúkdómur sem einkennist aðallega af hita, húðútbrotum, tárubólgu og bólgubreytingum í munnslímhúð, en getur haft í för með sér fylgikvilla í hjarta- og æðakerfi. Gúlamyndun í kransæðum sést hjá 15-20% ómeðhöndlaðra sjúklinga. Tilgangur þessarar afturskyggnu rannsóknar var að kanna nýgengi Kawasaki sjúkdóms hérlendis, tíðni hjartakvilla og annarra fylgikvilla. Fyrsti sjúklingurinn greindist á íslandi 1979. Til og með 1997 höfðu 40 börn greinst með sjúkdóminn hér á landi. Meðalnýgengi var 8,5/100.000 á ári hjá börnum undir fimm ára aldri. Kynjahlutfall (drengir/stúlkur) var 2:1. Fjöldi tilfella var breytilegur frá ári til árs, frá engu til sjö barna á ári. Hjartabilun greindist hjá þremur börnum og kransæðagúlar hjá fjórum. Einn sjúklingur lést úr hjartabilun tengdri Kawasaki sjúkdómi. Öll börn greind eftir 1987, að þremur undanskildum, voru meðhöndluð með mótefnum í æð. Nýgengi sjúkdómsins innan fimm ára aldurs er sambærilegt við niðurstöður rannsókna frá hinum Norðurlöndunum.