Áhyggjur foreldra af málþroska barna á aldrinum tveggja til sjö ára

Abstract

Tilgangur: Frumathugun á áhyggjum foreldra af málþroska barna sinna. Lítið er vitað um tíðni og birtingarform slíkra áhyggja en upplýsingar um þær eru mikilvægar fyrir reglubundið eftirlit með þroska. Efniviður og aðferðir: Rannsóknin byggir á gögnum sem aflað var í tengslum við víðtæka rannsókn á geðheilsu barna og unglinga á Íslandi á aldursbilinu 2-18 ára með spurningalista yfir atferli barna og unglinga (Child Behavior Checklist, CBCL). Kannaðar voru áhyggjur foreldra af málörðugleikum barna í úrtaki 444 barna af öllu landinu á aldrinum tveggja til sjö ára. Þessar áhyggjur, eins og þær birtust sem skrifaðar athugasemdir, voru síðan metnar af talmeinafræðingum og flokkaðar eftir því hvort þær áttu fremur við tal eða mál og einnig flokkaðar eftir alvarleika. Niðurstöður: Spurningalistinn nær til fjölbreytilegra áhyggjuefna af málþroska. Tæplega 13% barnanna voru talin hafa málörðugleika að mati foreldra. Tíðni svara um málörðugleika var ekki háð aldri. Hlutfall drengja og stúlkna í öllum aldurshópunum var 1,5:1. Við flokkun talmeinafræðinga á athugasemdum foreldra var oftar lýst talörðugleikum (72%) en málörðugleikum (18%). Talmeinafræðingarnir litu athugasemdir foreldra alvarlegri augum eftir því sem börnin urðu eldri. Ályktanir: Í flestum tilvikum voru áhyggjur foreldra taldar visa til raunverulegra vandamála að mati talmeinafræðinga. Fram komu vísbendingar um að ekki sé gerður mikill greinarmunur á máli og tali. Rannsaka þarf betur hvernig áhyggjur foreldra af málþroska birtast og hvernig þær tengjast tali, máli eða öðrum þroska. Slíkar upplýsingar geta verið leiðbeinandi um hvernig á að standa að fræðslu til foreldra og eru líklegar til þess að skerpa reglubundið eftirlit með þroska.