Meinvörp í stunguörum eftir gallkögun : sjúklingur með óvænt hulið briskrabbamein

Abstract

Árið 1994 var framkvæmd gallkögun á 63 ára gömlum sjúklingi vegna gallkveisu, aðgerðin gekk vel fyrir sig. Ómskoðun sem hafði verið framkvæmd fyrir aðgerð sýndi einungis gallsteina. Eftir aðgerð héldu verkir áfram en voru nú aðallega í miðjum kviði. Einum mánuði eftir aðgerð var sjúklingur lagður inn brátt vegna verkja um allt kviðarhol og auma fyrirferð í naflaörinu. Vegna gruns um innklemmt naflakviðslit var sjúklingur tekinn til aðgerðar. Fyrirferð var skorin burt og reyndist vera meinvarp frá kirtilkrabbameini. Svipuð fyrirferð fannst í öðru stunguöri. Tölvusneiðmynd sýndi krabbamein í brisi. Einkenni sjúklings versnuðu mjög hratt og lést hann fjórum mánuðum síðar. Fylgikvillar koma í stunguör eftir kaganir eins og önnur ör. Ymsar tilgátur eru uppi um orsakir þessara meinvarpa. Meinvörpum í stunguörum eftir gallkögum hefur ekki verið lýst í þremur stórum uppgjörum á gallkögunum. Þetta virðist því vera sjaldgæf hliðarverkun en þó hefur nokkrum tilfellum verið lýst.