Lífshorfur sjúklinga með heilabilun : afdrif dagvistarsjúklinga

Abstract

Tilgangur: Tilgangur rannsóknarinnar var að kanna lífshorfur sjúklinga með heilabilun og athuga hvort breyting hefði orðið á horfum þeirra síðustu tvo áratugi. Efniviður og aðferðir: Einstaklingar sem sótt höfðu dagvistun á höfuðborgarsvæðinu fyrir sjúklinga með heilabilun á 10 ára tímabili voru efniviður rannsóknarinnar. Þessir einstaklingar voru dæmigerðir fyrir þennan sjúklingahóp og því talið að afdrif hans gæfi almennt góða mynd af lífshorfum sjúklinga með heilabilun á þessu landsvæði. Niðurstöður: Af 180 innrituðum sjúklingum í dagvistinni höfðu 167 Alzheimers sjúkdóm eða blóðrásartruflanir í heila. Látist höfðu 97 sjúklingar og voru afdrif þeirra skoðuð beint (crude survival) og í samanburði við jafnaldra í íslensku þjóðfélagi (relative survival). Miðað var við tímann frá upphafi sjúkdómseinkenna. Sjúklingar með Alzheimers sjúkdóm virtust lifa að meðaltali 40% skemur en jafnaldrar þeirra. Helmingur sjúklinga með Alzheimers sjúkdóm var fallinn frá eftir liðlega átta ár en helmingur sjúklinga með blóðrásartruflanir eftir tæplega átta ár. Umræða: Heilabilun hefur í för með sér um-talsverða styttingu á ævilíkum. Sjúklingar á því tímabili sem hér var skoðað virtust þó lifa nokkru lengur en sjúklingar sem fengu heilabilun 10-15 árum fyrr, en mismunandi aðferðir við greiningu gera samanburð erfiðan.