Faraldsfræði alvarlegra brunaáverka á Íslandi 1988-1992

Abstract

Inngangur: Vegna mikils og frjáls aðgangs að heitu vatni hér hefur verið talið að brunaslys vegna hitaveitu- eða kranavatns séu algengari hér en í nágrannalöndunum. Tilgangur rannsóknarinnar var að skoða faraldsfræði alvarlegra brunaáverka á Íslandi á fimm ára tímabili frá 1988-1992. Efniviður og aðferðir: Farið var yfir allar sjúkraskrár sjúklinga vegna brunasára sem lágu á sjúkrahúsum á Stór-Reykjavíkursvæðinu og á Fjórðungsjúkrahúsinu á Akureyri (FSA). Einungis þeir sjúklingar sem höfðu brunasár sem aðalinnlagnarástæðu og fengu meðferð inni á sjúkrahúsi voru teknir með í rannsóknina og var fjöldi þeirra 266. Niðurstöður: Nýgengi innlagna vegna brunasára á þessu tímabili var 20,5 á 100.000 íbúa á ári. Algengast var að brunaslys orsökuðust af heitum vökvum og var hlutfall þeirra mun hærra hjá börnum fimm ára og yngri en þeim sem eldri voru. í 72,8% tilvika þar sem hveravatn orsakaði brunaáverka var um erlenda ferðamenn að ræða. Meginniðurstaða rannsóknarinnar er að um þriðjungur þeirra sem þurfa sjúkrahúsmeðferð vegna brunasára eru fimm ára og yngri. Nýgengi brunaáverka er svipað og erlendis. Rúmlega helmingur allra brunasjúklinganna brenndist á heitum vökvum og reyndist tíðni brunaáverka af völdum hitaveituvatns vera hærri hér á landi en erlendis. Ályktun: Mögulegt ætti að vera að draga úr tíðni brunaslysa hér á landi með aukinni útbreiðslu heitavatnslása á blöndunartækjum sem hindra að kranavatn verði heitara en 52-54°C og með aukinni fræðslu.