Ristilblóðþurrð hjá ungu fólki

Abstract

Inngangur: Ristilblóðþurrð hefur fyrst og fremst verið talin sjúkdómur eldra fólks með hjarta- og æðasjúkdóma. Ungt fólk hefur greinst með þennan kvilla á Fjórðungssjúkrahúsinu á Akureyri (FSA) og því þótti höfundum ástæða til að kanna algengi hans hjá yngra fólki, staðsetningu, sjúkdómsgang, áhættuþætti og afdrif. Efniviður og aðferðir: Leituð voru uppi öll tilfelli á tímabilinu 01.01. 1983 til 31.12. 1995. Einn höfunda (ÞP) endurskoðaði öll sýnin. Sett voru strong skilyrði fyrir greiningu og af 50 sjúklingum upphaflega athuguðum reyndust 26 uppfylla þau skilyrði, 16 konur og 10 karlar. Fimm voru yngri en 40 ára (19%), þar af þrír karlar. Niðurstöður: Blóðþurrð var algengust í vinstri hluta ristils. Tíðni hefur aukist síðustu ár, samhliða fjölgun ristilspeglana. Allir sjúklingar yngri en 40 ára voru með afturkvæma ristilbólgu, en átta af 21 eldri en 60 ára gengust undir aðgerð. Fimm dóu og voru þeir eldri en 75 ára. Hlutfall yngri sjúklinga er athyglisvert. Ályktun: Meinmyndun ristilblóðþurrðar hjá ungu fólki er illa skilgreind í flestum tilfellum. Mögulegir áhættuþættir hjá okkar sjúklingum voru meðal annars estrogen, bólgueyðandi gigtarlyf (NSAID), þurrkur, astmi, aukinn þrýstingur í kviðarholi, reykingar, ampicillín og hugsanlega E. coli, 0157:H7. Rannsókn okkar styður mikilvægi skjótrar speglunar og vefjaskoðunar til greiningar sjúklinga með bráðan og blóðugan niðurgang.