Tölfræði til hvers? : nokkrar ábendingar

Abstract

Með auknum fjölda rannsóknarverkefna innan læknisfræðinnar hafa viðfangsefnin orðið æ flóknari og kallað á enn frekari notkun tölfræði. Þó að forsendur fyrir beitingu tölfræði séu óbreyttar þá eru aðrar áherslur en áður í notkun á henni, þar sem auðveldara er nú með tölfræðiforritum að gera flókna útreikninga og prófa fleiri tilgátur. Í undirbúningi rannsókna er því hætta á að minna sé lagt upp úr vali á tilgátum. Verði tilgáturnar margar sem prófaðar eru tölfræðilega í sömu rannsókn, aukast líkur á að „samband" finnist milli þátta sem ekki tekst að staðfesta síðar. Veikleikar sem kunna að vera í undirbúningi og framkvæmd rannsóknar og síðan meðhöndlun gagna verða sjaldnast bættir upp með útreikningum. Því er í þessari grein vakin athygli á og skýrð nokkur tölfræðiatriði þessu tengd, og sem að fenginni reynslu höfundar eru oft vanmetin eða misskilin. Gert er ráð fyrir að lesandinn kunni einhver skil á tölfræði. Vanti frekari skýringar, er bent á heimildaskrá (1-6).