Getur fínasteríð hamið aukningu einkenna góðkynja blöðruhálskirtilsstækkunar? : tveggja ára lyfleysu samanburðarrannsókn

Abstract

Markmið: Leitað var svara við því hvort bati haldist hjá karlmönnum með einkenni vegna góðkynja stækkunar á blöðruhálskirtli (benign prostatic hyperplasia, BPH) sem fá lyfleysu? Könnuð voru áhrif og öryggisþættir með notkun 5 mg af fínasteríði í 24 mánuði. Aðferðir: Rannsóknin var tvíblind samanburðarrannsókn með lyfleysu á 707 sjúklingum með miðlungseinkenni vegna góðkynja stækkunar á blöðruhálskirtli og fór rannsóknin fram á 59 stöðum á Norðurlöndunum. Sjúklingar sem uppfylltu skilyrðin og höfðu verið á eins mánaðar blindu lyfleysutímabili voru samkvæmt slembiúrtaki settir á 5 mg af fínasteríði einu sinni á dag eða lyfleysu í 24 mánuði. Þvagvegaeinkenni, þvagflæði, stærð blöðruhálskirtils, eftirhreytuþvag og sértækt blöðruhálskirt-ilsmótefni í sermi (prostatic specific antigen, PSA) ásamt öðrum öryggismælingum var mælt í byrjun og í lok 12. og 24. mánaðar. Þess á milli voru sjúklingar athugaðir og blóð- og þvag-prufur teknar þegar ástæða þótti til vegna einkenna. Niðurstöður: Einkennaskorið (symptom score) batnaði meðan á rannsókn stóð hjá sjúklingum sem fengu fínasteríð, auk þess sem marktækur munur reyndist milli hópanna tveggja í lok 24. mánaðar (p<0,01). Einkennaskor sjúklinga í lyfleysuhópnum batnaði í byrjun en engin breyting frá grunnlínu reyndist hjá þeim á 24. mánuði. Hámarksþvagflæði minnkaði í lyfleysuhópnum en lagaðist í fínasteríðhópnum þar sem munurinn á milli hópanna var 1,8 ml á sekúndu í lok 24. mánaðar (p<0,01). Meðalbreyting á rúmmáli blöðruhálskirtils var +12% í lyfleysuhópnum en -19% í fínasteríðhópnum (p<0,01). Fínasteríð þoldist yfirleitt vel þau tvö ár sem rannsóknin stóð. Ályktun: Það sýnir sig að bati í einkennum, hámarksflæði og minna rúmmál blöðruhálskirtils við fínasteríðmeðferð helst í 24 mánuði, en ástand sjúklinga sem fá lyfleysu heist óbreytt og versnar jafnvel hvað þessa þætti varðar. Niðurstöðurnar sýna að fínasteríð getur snúið við eðlilegri þróun góðkynja stækkunar á blöðruhálskirtli.