Vaxandi lyfjaónæmi við þvagfærasýkingar?

Abstract

Þvagfærasýkingar eru vandamál sem oft koma til kasta heilsugæslunnar. Ekki eru fyrir hendi birtar rannsóknir um helstu orsakir þvagfærasýkinga hjá sjúklingum í heilsugæslunni hér á landi og hvernig sýklalyfjanæmi utan sjúkrahúsa er háttað. Þessi rannsókn nær til þriggja ára, 1992-1994 á þjónustusvæði Heilsugæslustöðvarinnar á Akureyri. Á tímabilinu voru gerðar 1996 þvagræktanir, þar af voru 966 jákvæðar (≥1O*5 þyrpingar/ml þvags fyrir alla sýkla nema Staphylococcus saprophyticus, þar sem miðað var við 5=104/ml). Eschercichia coli var algengasta orsök þvagfærasýkingar utan sjúkrahúsa og greindist í 82% tilvika og S. saprophyticus í 4% tilvika. Skert næmi eða ónæmi E. coli fyrir algengum sýklalyfjum var umtalsvert og meira en áður hefur verið sýnt fram á. Fyrir ampicillin mældist skert næmi í 2% tilvika og ónæmi í 36%. Samsvarandi hlutföll fyrir súlfafúrasól voru 8% og 29%; cefalótín 22% og 22%, trímetóprím 1% og 13%, mecillinam 5% og 11% og loks nitrofurantoin með skert næmi 12% og ónæmi í 1% tilvika. Ekki kom fram munur á tíðni ónæmis á milli ára gagnvart ampicillíni á þessu þriggja ára tímabili.