Rannsóknir á bakteríusjúkdómum í laxfiskum

Abstract

Helstu bakteríusjúkdómar í fiski á Íslandi eru kýlaveikibróðir, kýlaveiki, nýrnaveiki og víbríuveiki. Kýlaveikibróðir af völdum achromogene sem er undirtegund Aeromonas salmonicida, er landlægur sjúkdómur hér og sá bakteríusjúkdómur sem mestum skaða hefur valdið í íslensku fiskeldi. Klassísk kýlaveiki af völdum salmonicida sem er undirtegund A. salmonicida greindist í fyrsta sinn sumarið 1995. Á Keldum hefur verið lögð áhersla á að rannsaka sýkingarmátt undirtegundarinnar achromogenes, ónæmisviðbrögð í laxi og þróun bóluefnis gegn kýlaveikibróður. Laxfiskar í eldi hafa síðustu þrjú ár verið bólusettir gegn kýlaveikibróður með góðum árangri. Niðurstöður nýlegrar rannsóknar sýna að bóluefni gegn kýlaveikibróður veita nokkra vörn gegn kýlaveikismiti bæði í bleikju og laxi. Á Keldum er nú unnið að rannsókn á vörn mismunandi bóluefna gegn kýlaveiki og kýlaveikibróður. Nýrnaveiki af völdum Renibacterium salmoninarum er annar landlægur sjúkdómur í íslenskum laxfiskum. Forvarnaraðgerðir sem eru árangursríkar gegn smitdreifingu hafa verið þróaðar. Hraðvirk ELISA og PCR greiningarpróf hafa verið þróuð. Unnið er að könnun á tíðni nýrnaveiki í villtum silungastofnum. Nokkrir mismunandi stofnar af ættkvíslinni Vibrio hafa greinst úr roðsárum á eldislaxi. Sýklalyf og sérlöguð (autogeneous) bóluefni hafa verið notuð gegn sýkingum með góðum árangri. Rauðmunnaveiki af völdum Yersinia ruckeri hefur aðeins einu sinni verið greind (1990) í eldislaxi á Íslandi.