Samanburður á tveimur aðgerðarleiðum vegna æðakölkunar á kviðarholshluta ósæðar

Abstract

Auðvelt er að komast að ósæð gegnum kviðarholið (transperitoneal) en einnig bak við lífhimnu (retroperitoneal). Báðar aðferðir gagnast og eru notaðar á handlækningadeild Landspítalans. Tilgangur rannsóknarinnar var að bera saman þessar tvær aðgerðarleiðir. Frá 1979 til 1989 voru 47 sjúklingar skornir upp vegna þrengsla í ósæð og gerviæð sett inn (aorta bifemoral graft). Farið var bak við lífhimnu hjá 21 sjúklingi (hópur A) og í gegnum kviðarhol hjá 26 sjúklingum (hópur B). Rannsóknin var afturskyggn og ekki slembuð, borinn var saman aðgerðartími, blóðgjafir í aðgerð, fasta eftir aðgerð, sjúkrahúsvist og skurðdauði. Allir sjúklingarnir voru skornir upp af reyndum æðaskurðlæknum. Í hópi A voru 10 karlar og 11 konur með meðalaldur 63,4 ár. í hópi B voru 6 karlar og 10 konur með meðalaldur 60,3 ár. Í hópi A var aðgerðartíminn 185 mínútur en 248 mínútur í hópi B (p<0,05). Hópur A fastaði í fjóra daga eftir aðgerð en hópur B í fimm daga (p<0,05). Sjúklingar í hópi A dvöldu 11 daga á sjúkrahúsinu en sjúklingar í hópi B 15 daga (ns). Niðurstöður rannsóknarinnar benda til þess að fremur ætti að fara bak við lífhimnu kviðarhols við aðgerðir á ósæð.