Bráðaofnæmi hjá 20-44 ára Íslendingum

Abstract

Þessi rannsókn er hluti af öðrum áfanga Evrópukönnunarinnar um lungu og heilsu (The European Community Respiratory Health Survey) og fjallar um tíðni bráðaofnæmis hjá 20-44 ára Íslendingum í þéttbýli. Af 800 einstaklingum sem boðið var til könnunarinnar, tóku 570 þátt í henni með því að svara spurningalistum, 540 voru húðprófaðir með pikk aðferð og hjá 522 voru gerð RAST próf. Húðpróf voru túlkuð sem jákvæð ef húðsvörunin var >3mm. Sá sem hafði eina eða fleiri jákvæðar húðsvaranir var talinn hafa ofnæmi. Tíðni ofnæmis var 20,5%; hjá körlum 20,1% og hjá konum 20,9%. Tíðni ofnæmis var hæst í aldurshópnum 20-24 ára. Ofnæmi fannst fyrir vallarfoxgrasi hjá 8,5%, köttum hjá 7,6%, hundum hjá 6,3%, rykmaurum (Dermatophagoides pteronyssinus) hjá 6,1%, heymaurum (Lepidoglyphus destructor) hjá 3,2%, birki hjá 3% og myglu (Cladospor¬ium) hjá 1,1%. RAST próf var jákvætt (>0,35 ku/1) gagnvart vallarfoxgrasi hjá 11,9%, rykmaurum hjá 9,2%, köttum hjá 7,5%, myglu hjá 6,5% og birki 5,9%. Ofnæmi hjá móður var eini marktæki áhættuþátturinn fyrir ofnæmi. Borið saman við þær niðurstöður, sem birtar hafa verið á öðrum stöðum úr Evrópukönnun-inni, virðist tíðni ofnæmis lág hér á landi.