Áhrif kaffis og tes á neðri vélinda hringvöðva

Abstract

Áhrif kaffis og tes á neðri vélinda hringvöðva (lower esophageal sphincter, LES) voru athuguð í blint víxlaðri (blinded cross over) rannsókn á 12 heilbrigðum einstaklingum. Þrýstingur í neðri vélinda hringvöðva (LES pressure, LESP) og sýrumæling (pH) í vélinda var gerð samtímis með belglaga þrýstingsnema og pH skynjara í 20 mínútur fyrir og 90 mínútur eftir innspýtingu á fjórum tilraunarlausnum sem innihéldu ýmist koffínríkt kaffi (C), koffínsnautt kaffi (D), te (T) eða vatn (W). C ogT höfðu sama koffíninnihald, 160 mg. Borið saman við viðmiðunarblöndu (W), þá var þrýstingur neðri vélinda hringvöðva marktækt lægri eftir C og T, en ekki eftir D. Niðurstöður sýrumælinga voru í takt við þrýstingsmælingarnar, þannig að bakflæði átti sér oftast stað eftir C og T. Samanburður við W var marktækur hvað varðar T en ekki C. Við ályktum að bæði venjulegt koffínríkt kaffi og te orsaki vanstarfsemi á neðri vélinda hringvöðva, en koffínsnautt kaffi geri það ekki. Þessi rannsókn leiðir rök að því að sjúklingar með bólgu í vélinda vegna bakflæðis takmarki neyslu bæði á koffínríku kaffi og te.