Árangur þriggja lyfja meðferðar gegn Helicobacter pylori hjá sjúklingum með skeifugarnasár

Abstract

Tilgangur rannsóknarinnar var að meta virkni tveggja mismunandi útfærslna á þriggjalyfja meðferð, bismút, tetracýklín og metrónídazól, við Helicobacter pylori sýkingu. Ennfremur að kanna áhrif upprætingar á H. pylori á sjúkdómsgang skeifugarnarsárs. Rannsóknin náði til 82 sjúklinga (50 karla og 32 kvenna, meðalaldur 49 ár), sem allir höfðu sögu um þrálát skeifugarnarsár og H. pylori sýkingu. Hópur I (35 sjúklingar) fengu colloid bismút subcítrat (De-Nol®) 120mg x 4, tetracýklín 500 mg x 4 og metrónídazól 400 mg x 3 í 14 daga. Flestir fengu einnig H2 blokka eða ómeprazól meðan á meðferð stóð. Hópur II (47 sjúklingar) fékk ómeprazól 20 mg á fyrsta degi til 14. dags, colloid bismút subcítrat 120 mg x 4, tetracýklín 250 mg x 4 og metrónídazól 250 mg x 4 á fjórða degi til 14. dags. Uppræting á H. pylori var talin hafa tekist ef magasýni var H. pylori neikvætt á úreasa prófi þremur mánuðum eða síðar eftir meðferð. Uppræting tókst hjá 34 (97%) í hópi I og 43 (92%) í hópi II. Meðaltími frá meðferð til speglunar var 9,4 mánuðir í hópi I og 16 mánuðir í hópi II. Eftirlit með tilliti til einkenna var að meðaltali 20 mánuðir. Fimm sjúklingar í hópi I og átta í hópi II fengu einkenni án endursýkingar að nýju í stuttan tíma. Tveir (2,5%) sjúklingar, einn í hvorum hópi, fengu sár að nýju. Aukaverkanir voru algengar, flestar vægar nema hjá fjórum sjúklingum í hópi I sem fengu slæmar aukaverkanir. Það var áætlað að meðferðin hafi sparað sjö milljónir króna í lyfjakostnað hjá samanlögðum hópnum á eftirlitstímanum.