Könnun á algengi þvagleka meðal kvenna og árangri einfaldrar meðferðar í héraði

Abstract

Tilgangur þessarar rannsóknar var að kanna algengi þvagleka hjá konum sem dveljast utan stofnana, áhrif hans á daglegt lif og hvort hægt væri að bæta úr með einföldum aðferðum á heilsugæslustöð. Sendur var spurningalisti til allra kvenna 21 árs og eldri í Öxarfjarðarhéraði, sem bjuggu heima, alls 131 konu. Reyndust 63 (56%) hafa þvagleka, þar af 32 (29%) talsverðan eða mikinn. Af 63 konum með þvagleka höfðu 70% áreynsluþvagleka, 14% bráðaþvagleka og 16% blönduð einkenni. Marktækt samband var við fjölda fæðinga, en ekki við aldur. Þvaglekinn hafði heftandi áhrif á daglegt líf hjá 39% kvenna með þvagleka eða 20% af heildinni. Áður höfðu 26 konur fengið einhverja meðferð við þvagleka með misjöfnum árangri. Aðeins fjórar voru með þessa sjúkdómsgreiningu á heilsugæslustöðinni. Öllum með þvagleka var boðin æfingameðferð í hópum eða skriflegar leiðbeiningar um grindarbotnsæfingar. Tilboð um nánara mat og skoðun á heilsugæslustöð fengu allar með talsverð eða mikil einkenni og nokkrar síðan meðferð svo sem sýkla- eða hormónalyf. Nýr spurningalisti 10 mánuðum síðar sýndi að 61% kvennanna sögðust betri. Marktækt bestur var árangur þeirra sem höfðu haft áreynslueinkenni og komu í æfingahópa. Æfingar komu að gagni jafnvel við mikil einkenni og þótt þær væru aðeins gerðar einu sinni til tvisvar í viku. Mælt er með að greining verði virkari og konum með þvagleka boðið upp á skipulega æfingameðferð og hormónameðferð eftir tíðahvörf áður en gripið er til skurðaðgerðar.