Athugun á tvíburafæðingum eftir eðlilegan getnað og glasafrjóvgun

Abstract

Tvíburameðgöngur og -fæðingar eru almennt taldar áhættumeiri en einburafæðingar. Með tilkomu tæknifrjóvgunar hefur tvíburafæðingum fjölgað en lítið er vitað um áhrif þess á meðferð og útkomu tvíburafæðinga. Á tímabilinu 1990-1993 voru 254 tvíburameðgöngur á Íslandi, þar sem meðgöngulengd var 16 vikur eða meira. Af þeim voru 52 (20,5%) eftir glasafrjóvgun. Tíðni tvíburafæðinga var í heild 1:73 en meðal eðlilega getinna tvíbura var hún 1:90. Konur sem fóru í glasafrjóvgun voru að meðaltali þremur árum eldri en þær sem urðu eðlilega þungaðar. Ekki var munur á líkamshæð eða reykingavenjum. Meðalmeðgöngulengd var 36 ± 3,68 (SD) vikur hjá báðum hópunum. Fæðing hófst eðlilega hjá 61,9% kvenna með náttúrulega þungun og hjá 51,9% kvenna í glasakomna hópnum (N.S.). Hjá 64,4% kvenna með náttúrulega þungun og 58,8% kvenna í glasahópnum varð eðlileg fæðing. Fjöldi valinna og bráðra keisaraskurða var svipaður þó tilhneiging hafi sést til tíðari fyrirfram ákveðinna keisaraskurða í glasakomna hópnum. Inngrip í fæðingu með töng eða sogklukku voru algengari hjá glasafrjóvgaða hópnum (p< 0,02). Glasakomnu tvíburarnir voru að meðaltali 64g léttari (meðalþyngd 2552g) en náttúrulega getnu tvíburarnir (meðalþyngd 2616g) sem var óháð reykingum og meðgöngulengd. Kynhlutfall var hærra hjá glasakomnum tvíburum. Glasakomnir tvíburar voru oftar lagðir inn á vökudeild en dvöldu þar skemur. Burðarmálsdauði var svipaður í báðum hópunum eða 20/1000 samkvæmt hefðbundinni skilgreiningu. Í öllum meginatriðum var meðferð og útkoma í tvíburameðgöngum eftir glasafrjóvgun ekki frábrugðin því sem er eftir náttúrulega þungun.