Klínískar efnamælingar og bakteríurannsóknir á Íslandi árið 1990

Abstract

Könnun var gerð á fjölda og tegundum meinefnafræði-, blóðmeinafræði- og bakteríurannsókna á Íslandi árið 1990. Spurningalistar voru sendir til allra aðila á landinu sem taldir voru gera slíkar rannsóknir, alls 85 stofnana. Spurt var um fjölda og tegundir rannsókna á viðkomandi ári. Svör bárust frá 52 eða 61%. Rannsóknafjöldi þeirra stofnana sem ekki svöruðu var áætlaður. Alls reyndust um 1,7 milljónir rannsókna gerðar á landinu þetta ár sem svarar til 6,7 rannsókna á einstakling. Samanburður við fyrri könnun fyrir árið 1982 leiddi í ljós 28,5% fjölgun rannsókna á tímabilinu eða 3,0% aukningu á ári. Mest var aukningin í bakteríuræktunum eða 53%, 49% í meinefnafræðirannsóknum, 1% í blóðmeinafræðirannsóknum en þvagrannsóknum fækkaði um 25%. Aðrar rannsóknir jukust um 26%. Rannsóknum við heilsugæslustöðvar fækkaði um 10% en rannsóknum fjölgaði við sjúkrahús; 30% við stór sjúkrahús og 14,5% við önnur sjúkrahús. Upplýsingar um breytingar á rannsóknafjölda við einkareknar rannsóknastofur liggja ekki fyrir. Blóðhagur og sökkmæling voru algengustu rannsóknirnar. Öll stór sjúkrahús, um fimmti hluti annarra sjúkrahúsa en engin heilsugæslustöð tóku þátt í ytra gæðaeftirliti.