Meðferð háþrýstings hjá rosknum körlum

Abstract

Ekki er vitað hve notkun á háþrýstingslyfjum er mikil á Íslandi eða hvernig sú notkun skiptist milli lyfjaflokka. Í rannsóknarhópi Hjartaverndar reyndust 1145 karlar á aldrinum 70-84 ára vera á lífi árið 1991 og mættu 834 til rannsóknar. Af þeim reyndust 429 annað hvort hafa sögu um háþrýsting eða höfðu háan blóðþrýsting við mælingu á Rannsóknarstöð Hjartaverndar. Í ljós kom að 157 karlar tóku lyf eingöngu vegna háþrýstings. Níutíu og fimm voru meðhöndlaðir með einu lyfi, 49 með tveimur, fimm með þremur lyfjum, en sundurliðun vantaði hjá átta körlum. Þvagræsilyf og ß-blokkar voru langmest notuð, en meðferð með þvagræsilyfjum virtist áhrifaríkari en með ß-blokkum. Langalgengasta samsetningin reyndist vera ß-blokkar og þvagræsilyf, síðan angiotensin ummyndunarblokkar og þvagræsi-lyf, þá ß-blokkar og kalsíumblokkar. Leidd eru fagleg og fjárhagsleg rök fyrir því að aukin notkun þvagræsilyfja sé æskileg í þessum aldurshópi.