Ofbeldisáverkar : faraldsfræðileg athugun í Reykjavík 1974-1991

Abstract

Tilgangur rannsóknarinnar var að kanna nýgengi ofbeldisáverka í Reykjavik. Lögskráðir íbúar Reykjavíkur, sem höfðu leitað á slysadeild Borgarspítalans á árunum 1974-1991 vegna ofbeldisáverka, voru skráðir á tölvutækan hátt. Ofbeldisáverkar frá árinu 1991 voru athugaðir sérstaklega með tilliti til þess hvar og hvenær þeir áttu sér stað. Aldursleiðrétt nýgengi ofbeldisáverka var breytilegt á tímabilinu. Hvað karla varðar jókst það úr 17,3 af þúsund á ári og 7,2 hjá konum árin 1974-1976 í 19,3 og 8,4 árin 1977-1979. Árin 1980-1982 fækkaði áverkum um nálega 30% hjá báðum kynjum. Frá þeim tíma hafa ofbeldisáverkar aukist marktækt og var nýgengi þeirra 19,8 hjá körlum og 7,0 hjá konum árin 1989-91. Nýgengi ofbeldisáverka var hæst hjá körlum og konum í aldurshópnum 15-19 ára eða 46 og 15. Á tímabilinu tvöfaldaðist nýgengi innlagna eftir ofbeldisáverka, jókst úr 0,54 í 1,10 hjá körlum og 0,20 í 0,42 hjá konum. Um helmingur þeirra sem leituðu slysadeildar vegna ofbeldisáverka (53% karla og 43% kvenna) gerðu það á laugardögum og sunnudögum. Stór hluti kvenna varð fyrir ofbeldisáverkum inni á heimili (41%) en ofbeldisáverkar hjá körlum voru algengastir á skemmtistað (25%) eða úti við (33%).