Lifrarúrnám vegna æxla í lifur : reynsla af notkun hljóðbylguhnífs

Abstract

Æxli í lifur, bæði frumæxli og meinvörp, eru algeng. Þótt sjaldnast séu þau skurötæk, eru læknandi aðgerðir stundum mögulegar. Tilgangur rannsóknar okkar var tvíþættur, annars vegar að gera grein fyrir árangri og reynslu af aðgerðum á lifur vegna frumæxla og meinvarpa og hins vegar að kynna árangur af notkun hljóðbylgjuhnífs (CUSA). Gerð var afturskyggn rannsókn á öllum sjúklingum, sem gengust undir valaðgerð (elective) á lifraræxli með hjálp hljóðbylgjuhnífs á Borgarspítala og Landspítala á árunum 1986-1993, alls 14 sjúklingar. Sérstaklega var athuguð tegund æxlis, hvaða hlutar lifrar voru fjarlægðir, blæðing í aðgerð, blóðgjöf, legutími og fylgikvillar. Lífslíkur voru metnar með líftöflu að hætti Kaplan-Meyer. Einnig var athugað hve langur tími leið þar til sjúkdómur tók sig upp aftur. Fjórtán sjúklingar. gengust undir fimmtán aðgerðir, sex fengu fylgikvilla sem leiddu til fimm opinna enduraðgerða og einu sinni var stungið á kýli. Miðtala blæðingar var 3000 ml (350-10.600 ml), miðtala blóðgjafar var 3000 ml (0-12.000 ml), miðtala legu var 24 dagar (9-108 dagar). Skurðdauði var enginn. Af níu sjúklingum sem skornir voru vegna meinvarpa í lifur, eru fjórir (44%) á lífi 15, 41, 46 og 72 mánuðum eftir aðgerð en hjá tveimur þeirra hefur sjúkdómur tekið sig upp. Tveir sjúklingar voru skornir vegna lifraræxlis og er annar á lífi 86 mánuðum eftir aðgerð og telst læknaður. Við ályktum að einnig hér á landi sé lifrarúrnám (resection) vegna meinvarpa eða frumæxlis í lifur álitlegur valkostur, þar eð annarri meðferð er ekki til að dreifa og niðurstöður okkar eru sambærilegar við það sem best gerist erlendis. Hljóðbylgjuhnífur virðist gera þessar aðgerðir tæknilega auðveldari og minnka hættu á blæðingu.