Áhættuþættir slagæðasjúkdóma meðal karla : áhrif tóbaksreykinga og kólesteróls á blóðrennsli til ganglilma miðaldra karla

Abstract

Tilgangur rannsóknarinnar var að meta óháð áhrif reykinga og kólesteróls á slagæðablóðflæði til ganglima hjá miðaldra karlmönnum sem töldust án einkenna slagæðasjúkdóms. Níutíu og tveir karlmenn án einkenna um slagæðasjúkdóm, á aldrinum 40-60 ára, mættu til rannsóknarinnar. Fjörutíu og átta þeirra reyktu ekki tóbak (38 höfðu kólesterólgildi undir 220 mg/dl og 10 yfir 270 mg/dl) og 44 voru reykingamenn (30 höfðu kólesterólgildi undir 220 mg/dl og 14 yfir 270 mg/dl). Reiknað var hlutfall blóðþrýstings, sem mældur var í ökkla og upphandlegg. Ennfremur var mældur hraði blóðrennslis í náraslagæðum fyrir og eftir létta áreynslu. Niðurstöður voru skoðaðar með tilliti til reykingavenja og blóðfitugilda og reynt að meta einstök áhrif þessara þátta. Reykingamenn reyndust hafa mun lægra ökkla/arms blóðþrýstingshlutfall og aukinn hraða á blóðrennsli í neðri útlimum strax eftir áreynslu samanborið við menn sem ekki reyktu. Tóbaksreykingar valda meiri truflun á blóðrennsli til ganglima en hátt kólesteról gerir. Þegar saman fara reykingar og hátt kólesteról eru skaðleg áhrif og truflun blóðrennslis aukin (p<0,0001). Þessi áhrif koma greinilega fram við áreynslu. Fram kemur hærri blóðþrýstingur og hraðari hjartsláttur reykingamanna bæði í hvíld og við áreynslu (p<0,05) sem gæti bent til skerts áreynsluþols. Þá má einnig greina hagstæð áhrif lágs blóðþrýstings, lágrar blóðfitu og lífs án reykinga (p<0,01).