Nýjar aðferðir til að hafa áhrif á frásog og dreifingu lyfja

Abstract

Það er draumur hvers manns sem fæst við rannsóknir í lyfjafræði að uppgötva nýtt lyf en þetta er þó fjarlægur draumur. Reynslan sýnir að af hverjum 9000 nýjum efnasamböndum sem eru samtengd og rannsökuð með tilliti til lyfhrifa verður aðeins eitt að nothæfu lyfi. Mörg lyf og lyfjaflokkar hafa verið uppgötvuð fyrir slysni, eða með einhverjum happa og glappa aðferðum. Á seinni árum hefur verið reynt að þróa aðferðir sem hægt er að beita við hönnun og rannsóknir á nýjum lyfjum (1). Við rannsóknir á nýjum lyfjum hef ég beitt tveimur kerfisbundnum aðferðum til að hafa áhrif á frásog lyfja inn í líkamann, dreifingu þeirra um líkamann og útskilnað þeirra út úr líkamanum. Þessar aðferðir byggjast annars vegar á forlyfjum og hins vegar á mjúkum lyfjum (sjá skilgreiningu á forlyfjum og mjúkum lyfjum síðar í greininni).