Nýgengi og greining meðfæddra hjartagalla á Íslandi

Abstract

Tilgangur rannsóknarinnar var að athuga nýgengi meðfæddra hjartagalla á Íslandi, dreifingu einstakra galla, greiningu og afdrif barna með hjartagalla. Rannsóknin nær til barna sem fædd eru á Íslandi á árunum 1985-1989. Alls greindust 215 börn með hjartagalla eða 1,1% fæddra. Þar af voru 99 börn með alvarlegan hjartagalla eða 0,47% fæddra. Af þeim sem voru með vægan hjartagalla (116 börn) voru 94 með lítið op á milli slegla (VSD). Af börnum með alvarlegan hjartagalla voru 25 með VSD, 16 með op á milli gátta, 15 með opna fósturæð, átta með þrengsli í ósæð, sjö með slagæðavíxl, sex með Fallots tetralogíu, en aðrir gallar komu sjaldnar fyrir. Tuttugu og þrjú börn sem höfðu alvarlegan hjartagalla höfðu einnig aðra fæðingargalla, þar af voru 12 börn með ýmsa litningagalla (Downs-heilkenni, níu börn). Helmingur barnanna með alvarlegan hjartagalla greindust fyrir brottför af fæðingarstofnun (47%). Hin börnin greindust eftir komu í ungbarnaeftirlit (17%), eftir komu á stofu hjá lækni (18%) og við innlögn á sjúkrahús (18%). Sautján börn, af 99 með alvarlegan hjartagalla, létust en 80 eru við góða heilsu. Við ályktum að nýgengi meðfæddra hjartagalla sé svipað hérlendis og víða erlendis. Þó finnast hér heldur fleiri börn með op á milli gátta og opna fósturæð. Nýgengi opa á milli gátta hefur farið vaxandi á tímabilinu. Börnum með alvarlega hjartagalla farnast að jafnaði mjög vel eftir aðgerð.