Samband hjartsláttartíðni, heilsufarsþátta, reykinga og dánarmeina

Abstract

Mæling á hjartsláttartíðni er ein algengasta athugun, sem gerð er við klíníska skoðun. Mikilvægi þessa þáttar í mati á heilsufari er að vissu leyti þekkt, sérstaklega þegar ýmsir sjúkdómar raska líkamsstarfsemi, til dæmis efnaskiptasjúkdómar, blóðsjúkdómar, sýkingar og hjarta- og lungnasjúkdómar. Um áhrif og forspárgildi hjartsláttartíðni á heilsufar, þegar til lengri tíma er litið, er hins vegar minna vitað. Þó hafa verið gerðar ýmsar rannsóknir erlendis á undanförnum árum sem beinast að þessu (1-3). Í þessum rannsóknum hefur jafnframt verið kannað samband hjartsláttartíðni við þekkta áhættuþætti hjarta- og æðasjúkdóma. Í rannsókn Hjartaverndar eru stórir hópar sem fylgt hefur verið lengi eftir, og gefur því rannsóknin tækifæri til að kanna þessa þætti. Í þeirri athugun sem hér er kynnt, á rúmlega fimm þúsund íslenskum körlum, er kannað samband hjartsláttartíðni við áhættuþætti hjarta- og æðasjúkdóma í mismunandi hópum eftir reykingavenjum og samband hjartsláttartíðni við dánarorsakir.