Óþægindi frá stoðkerfi meðal fiskvinnslufólks

Abstract

Starf í fiskvinnslu er talið erfitt en lítið er vitað hvort það veldur óþægindum frá stoðkerfi. Þessi rannsókn var gerð til að kanna hvort verkir og önnur óþægindi væru algengari meðal fiskvinnslufólks en annarra. Starfsmönnum átta fiskvinnslufyrirtækja og úrtaki íslensku þjóðarinnar var sendur spurningalisti, þar sem spurt var um algengi verkja frá ýmsum líkamssvæðum. Svörun var 67,6% hjá fiskvinnslufólkinu. Verkir og óþægindi reyndust tíðari meðal fiskvinnslufólksins en í samanburðarhópnum. Hlutfallstölur vegna verkja í úlnliðum, öxlum, fingrum og efri hluta baks á síðustu 12 mánuðum voru tveir eða hærri. Þegar spurt var hvort óþægindin hefðu hindrað fólk við vinnu heima eða að heiman voru hlutfallstölurnar hjá körlum hæstar vegna verkja í efri og neðri hluta baks, úlnliðum, hálsi og mjöðmum. Hlutfallstölurnar hjá konum voru hæstar vegna verkja í ökklum, mjöðmum, hálsi og neðri hluta baks. Tuttugu og fimm prósent fiskvinnslukvenna höfðu leitað meðferðar vegna verkja í herðum á síðustu 12 mánuðum en 17,5% kvenna í þjóðarúrtakinu. Hjá körlum í fiskvinnslu var hlutfallið 18,9% en 7,7% hjá körlum í þjóðarúrtakinu. Það virðist mega rekja tíða verki og óþægindi meðal fiskvinnslufólksins til einhæfra verkefna og endurtekinna sömu hreyfinga sem einkenna fiskvinnsluna. Þrátt fyrir að tæknilegar framfarir hafi átt sér stað á undanförnum árum er þörf að leita enn frekari tæknilegra lausna, bæta vinnuskipulag og meðal annars endurhanna hnífa til þess að draga úr álagseinkennum.