Moraxella (Branhamella) catarrhalis og öndunarfærasýkingar í sjúklingum með langvinna öndunarfærasjúkdóma

Abstract

Moraxella (Branhamella) catarrhalis er hluti eðlilegrar örveruflóru efri loftvega mannsins. Komið hefur í ljós að hún getur valdið ýmsum sýkingum, einkum lungnabólgum hjá sjúklingum með langvinna lungnasjúkdóma, skúta- og eyrnabólgum. Ákveðið var að kanna tíðni bakteríunnar í hrákasýnum frá sjúklingum með langvinna lungnasjúkdóma og hve oft hún teldist orsök neðri loftvegasýkinga hjá þeim. Rannsóknin var bæði afturvirk og framvirk og var farið yfir ræktanir og sjúkraskrár 179 sjúklinga á lungnadeild Vífilsstaðaspítala. Frá þessum sjúklingum voru tekin 335 hrákasýni til ræktunar og voru 149 þeirra jákvæð, þar af 37 (25%) með M. catarrhalis. M. catarrhalis var önnur algengasta orsök lungnabólgu hjá þessum sjúklingum, auk þess sem hún var algengari hjá sjúklingum með langvinna lungnateppu en astmasjúklingum. Næstum 90% stofnanna mynduðu β-laktamasa. M. catarrhalis er mikilvæg orsök lungnasýkinga hjá sjúklingum með langvinna lungnateppu og flestir stofnanna mynda β-laktamasa.