Hjúkrun sem fagleg umhyggja : kynning á hjúkrunarkenningu

Abstract

Í þessari grein er kynnt hjúkrunarkenningin: Hjúkrun sem fagleg umhyggja. Kenningin var samþætt úr sjö meginrannsóknum höfundar og samstarfskvenna. Megininntak kenningarinnar er að hjúkrun sé fagleg umhyggja og að umhyggja sé innsta eðli hjúkrunar en sé þó aðeins einn af fimm meginþáttum faglegrar umhyggju. Hinir þættirnir eru: fagleg færni, sem ætíð verði að vera í fyrirrúmi í hjúkrun; fagviska, sem verði til við samspil þekkingar og reynslu; uppbyggjandi samskipti og tengsl milli hjúkrunarfræðings og skjólstæðings, sem sé lykilþáttur í góðri hjúkrun; og sjálfsþekking og sjálfsrækt hjúkrunarfræðingsins, en án slíkrar innri vinnu sé hætt við því að hjúkrunarfræðingurinn geti ekki til lengdar sýnt umhyggju og haft uppbyggjandi samskipti við skjólstæðinga. Í greininni verður fyrst fjallað um umhyggju frá ýmsum sjónarhólum til að setja kenninguna í fræðilegt samhengi, síðan er gerð grein fyrir kenningunni og um hana rætt. Að lokum er fjallað um notagildi kenningarinnar og sett fram gagnrýni á hana.