Húsasótt : könnun á líðan fólks á 10 vinnustöðum

Abstract

Þversniðsathugun á fyrirbærinu húsasótt (sick building syndrome) var gerð meðal fólks í átta húsum, en á 10 vinnustöðum. Notaður var spurningalisti sem ýmist var sendur fólki í pósti eða lagður fyrir það á vinnustaðnum. Athuganirnar voru ýmist gerðar að beiðni, vegna kvartana folks um vanlíðan, eða að frumkvæði rannsakenda sjálfra. Í húsum sem loftræst voru um glugga og dyr og þar sem ekki voru neinir rakagjafar fann folk fyrir minnstum óþægindum. Í húsum sem voru með vélrænni loftræstingu og öll með rakagjöf, utan eitt, hafði fólk meiri einkenni en í gluggaloftræstu húsunum hvort sem litið var eingöngu á þau hús sem athuguð voru að beiðni, vegna kvartana, eða hin sem athuguð voru til samanburðar. Tíðni augneinkenna var til dæmis 17.1% í gluggaloftræstu húsunum en frá 28.2-66.3% í húsum með vélrænni loftræstingu. Samsvarandi tölur vegna óþæginda í nefi voru 10.5% í gluggaloftræstu húsunum á móti 19.2-60.7% í þeim vélrænt loftræstu. Í gluggaloftræstum húsum kvörtuðu 13.3% undan óeðlilegri þreytu, en tíðni slíkra kvartana var 19.2-53.6% í hinum húsunum og samsvarandi tölur vegna höfuðverks voru 11.4% á móti 21.2-51.7%. Athugun á fellirriótefnum, sem var gerð í fimm húsum, benti ekki til að einkenni folks mætti rekja til mengunar örvera úr rakagjöfum. Heilsusamlegustu húsin virðast vera þau sem loftræst eru með opnanlegum gluggum, þar sem hvorki er vélræn endurnýting loftsins né rakagjöf.