Fósturvöxtur íslenskra einbura

Abstract

Framvirk athugun á fósturvexti íslenskra einbura var gerð með mælingum í 94 heilbrigðum konum á öðrum og þriðja meðgönguþriðjungi. Allar konurnar gátu dagsett fyrsta dag síðustu tíða nákvæmlega og höfðu reglubundinn tíðahring. Mælingar voru gerðar á þriggja vikna fresti á höfuðmálum, 1) þvermáli (biparietal diameter (BPD)) og 2) fram-aftur máli (occipito-frontal diameter (OFD)), lengd lærleggjar og upparmsleggjar og tveimur þvermálum búks. Meðalbúkþvermál var einnig reiknað. Heildarfjöldi mælinga var 3795 og hver kona kom að meðaltali í átta mælingar. Mælingarnar voru tölvufærðar og flokkaðar til úrvinnslu í 12 tveggja-vikna flokka. Fjölþátta aðhvarfsjöfnur voru reiknaðar og jafnan sem sýndi besta aðlögun að mælingunum fyrir hvert mál valin samkvæmt hæsta ákvörðunarstuðlinum (r2) og minnsta meðalfráviki (SD) aðhvarfslínunnar. Þriðju gráðu aðhvarfsjöfnur lýstu best gildum fyrir beinamælingarnar, en annarrar gráðu jöfnur hæfðu búkmælingunum. Aðhvarfslínur meðalgilda og tveggja meðalfrávika voru færðar á flæðirit. Meðalgildi fyrir BPD og meðalbúkmælingar samkvæmt jöfnum frá öðrum Norðurlöndum voru borin saman við mælingar úr þessari athugun. Mælingar fyrir beinvöxt eru mjög svipaðar á Íslandi og annarsstaðar. Búkmælingarnar sýndu kerfisbundinn mun á þann veg að íslensku gildin voru að meðaltali um 7% lægri en sænskar tölur. Þetta byggist sennilega á mismunandi mælingaaðferðum. Við mat á fósturþyngd út frá erlendum töflum eða jöfnum þarf að gera ráð fyrir þessum mun og nota viðeigandi leiðréttingu.