Upphenging á aftursveigðu legi vegna sársauka við samfarir : aðgerðir framkvæmdar á Sjúkrahúsi Akraness 1983 til 1985

Abstract

Innri sársauki við samfarir (dyspareunia) er algeng kvörtun hjá konum sem leita til kvensjúkdómalækna. Með innri sársauka er átt við sársauka í kviði og grindarholi sem kemur við eða strax á eftir samförum. Innri sársauki við samfarir er sameiginlegt einkenni margra sjúkdóma. Oft valda því eftirköst sýkinga í innri kynfærum og grindarholi svo og legslímuvilla (endometriosis) (1), blóðríki í grindarholi (pelvic congestion) (2) og fleira. Stundum finnst engin líffærafræðileg orsök. Aftursveigt leg er einnig talið geta orsakað sársauka við samfarir (1), en er annars algengt fyrirbæri og yfirleitt meinlaust eða eðlilegt. Í þessari grein er fjallað um rannsókn sem höfundur gerði á árangri aðgerðar sem nefhist upphenging á legi (ventrisuspensio uteri), hjá konum sem höfðu verki og sársauka, sem talið var að rekja mætti til aftursveigðs legs. Höfundi er ekki kunnugt um, að áður hafi verið ritað um árangur slíkra aðgerða hér á landi.