Forvarnir geðsjúkdóma aldraðra

Abstract

Betra er heilt en vel gróið segir gamalt máltæki og minnir á að mönnum hefur lengi verið ljóst mikilvægi forvarna. Til þess að geta beitt forvörnum verður að þekkja hætturnar og kunna skil á orsökum þeirra. Þegar öldrunargeðlækningar tóku að ryðja sér til rúms fyrir 20-30 árum síðan varð ljóst að betur mátti gera á þessu sviði, sem fram að því hafði verið vanrækt. Í kjölfar þess að vekja athygli á sérstöðu geðsjúkdóma aldraðs folks var farið að rannsaka eðli þeirra. Upplýsingar sem fengist hafa með þessum rannsóknum hafa síðan verið nýttar til að koma af stað, eða a. m. k. tala um forvarnir á þessu sviði. Þannig má segja að góðar og hvetjandi aðstæður til rannsókna á geðsjúkdómum aldraðra sé ein af grundvallarforvörnum á þessu sviði. Tveir algengustu sjúkdómar ellinnar eru heilabilun og þunglyndi. Mikilvægar upplýsingar sem að gagni gætu komið til forvarna liggja nú fyrir. Verður nú fjallað stuttlega um forvarnir þessara tveggja sjúkdóma. Enfremur verður minnst forvarnargildi þess að vera virkur þjóðfélagsþegn án tillits til aldurs.