Hjartadrep eða bráð hjartabilun án kransæða- eða lokusjúkdóms : bólga í hjartavöðva

Abstract

Innlagnir á sjúkrahús af völdum bráðabólgu í hjartavöðva eru fremur fátíðar. Árin 1985-86 lögðust óvenju margir sjúklingar inn á Borgarspítalann sem taldir voru hafa þennan sjúkdóm eða sjö talsins. Um var að ræða sex karla og eina konu. Sjúklingarnir voru á aldrinum 20-56 ára við greiningu en flestir á þrítugsaldri, meðalaldur 28,8 ár (tafla I). Fimm þeirra fengu alvarlega fylgikvilla og tveir hafa látist. Sagt verður nánar frá þessum sjúklingum hér á eftir. Greining sjúkdómsins er erfið og byggist fyrst og fremst á einkennum. Hefðbundnar rannsóknaraðferðir eru til nokkurrar hjálpar svo sem hjartalínurit, röntgenmynd og hjartahvatar. Hvatarnir eru þó aðeins hækkaðir í takmarkaðan tíma og því stundum orðnir eðlilegir þegar sjúklingurinn kemur til skoðunar. Sértækari rannsóknaraðferðir hafa einnig komið til sögunnar svo sem sýnitaka úr hjartavöðva eins og vikið verður að (1¬3). Meðferð er fyrst og fremst fólgin í að draga úr einkennum. Einnig hefur verið reynt að hafa áhrif á gang sjúkdómsins og draga úr bólgusvörun með barksterum og/eða ónæmisbælandi lyfjum (4).