Kólesteról í blóði : áhrif erfðaþátta

Abstract

Kólesterólmagn í sermi ákvarðast af erfðum og umhverfisþáttum og samspili þeirra. Fjölmargar rannsóknir benda til þess að um eða yfir 50% af mismun kólesterólgilda einstaklinga megi rekja til áhrifa erfðaþátta (1, 2) en stærstan hluta af mismun meðalgilda þjóða megi rekja til mismunandi mataræðis, einkanlega mismikillar neyslu á mettaðri dýrafitu (3). Í þessari yfirlitsgrein verður reynt að gera grein fyrir helstu erfðaþáttum sem þekktir eru að hafa áhrif á kólesterólgildi í blóði, til hækkunar eða lækkunar. Sérstaklega verður minnst á íslenskar niðurstöður þar sem þær eru til. Margt er enn óþekkt í sambandi við þátt erfða í þessu sambandi en nýjungar í erfðatækni hafa aukið þekkinguna stórlega á þessu sviði og gera væntanlega í enn ríkari mæli á allra næstu árum.