Síþreyta

Abstract

Þreyta á sér margar orsakir. Hún er algeng meðal þeirra sem ekki ganga heilir til skógar. Það er alkunna. Geðrænir sjúkdómar geta valdið henni. Hún getur einnig verið eitt af einkennum svo nefndra vefrænna sjúkdóma sem eiga sér þekkta orsök. Þreyta getur verið aðaleinkenni þessara sjúkdóma. Hún getur einnig verið aukaverkun af óhjákvæmilegri meðferð jafnt með lyfjum og/eða skurðaðgerðum. Sú þreyta sem þessu fylgir er stundum veruleg og veldur þá umtalsverðum sjúkleika. Þreytan er stundum illskýranleg. En af þessu má vera ljóst að allir sem leita til lækna vegna þreytu þarfnast nákvæms mats og rækilega þarf að útiloka sérstakar orsakir hvort heldur eru andlegar eða líkamlegar. Ekki verður ráðin bót á þreytunni nema takist að lækna sjúkleika þá sem liggja að baki í þessum tilvikum.