Hrotur + öndunarhlé + dagsyfja = kæfisvefn

Abstract

Aðeins eru tæpir þrír áratugir frá því að læknum varð almennt ljóst að til eru öndunartruflanir, sem eingöngu koma fram í svefni. Þessar truflanir hafa jafnframt víðtæk áhrif á líðan að degi til. Langalgengasta öndunartruflunin er öndunarhlé, sem oftast stafar af þrengslum í efri loftvegum (nefi eða koki) þegar sofið er. Talað er um öndunarhlé þegar öndunin hættir í 10 sekúndur eða lengur. Þegar öndunarhléin eru fleiri en 30 að nóttu og önnur sjúkdómseinkenni einnig til staðar er það ástand kallað kæfisvefn (á ensku sleep apnea syndrome). Kæfisvefn getur verið á mjög mismunandi háu stigi, allt frá nokkrum tugum öndunarhléa til fleiri hundruð öndunarhléa yfir nóttina.